Goeant Konkani Romi Lipi Khoimche Suvater?

Goeant Konkani Romi Lipi Khoimche Suvater?

Ganv-bhoin Brenda Menezes hachi 'one-act plays in Konkani' hem pustok Goa Konkani Academy hanchea asrea-khal porgott zala tem vachun jivak khos bhogli. Mhojim un-unit porbhim bai Brendak, tachea hea molladik vaurak. Ojeap dista bai Brenda-n, hem pustok Romi Lipin-n kaddinastanm Nagri Lipi-n porgott kelem tem polloun. Ho mhuzo ek xinn koso taka, zalear ho ek amkam Romi boroiteleank okmann koso zaun asa. Goeant aiz Romi Lipi-k mannacho dhorzo favo korunk nam. Anim dista Goa Konkani Academy aiz Romi lipik bhed-bhav korta xi, anim dista Academy fokot Nagrik tenko dita xi. Hi Romi anim Nagri lipimchi dusmankai, kednam punn nopoit zait ghai? Kiteak azun passun donui lipi-nk ek sarkho dhorzo kiteak favo zaunk nam? Unnench mhollear aiz ponchvis vorsam odhik torui zalim, him lipink lagon Goeant dusmankai cholta. Mhojea bhurgea ponnar anvem zaitinch borovpam keleat, Goeant anim Bombaim porgott zatelea soglea potramcher anim masikamcher punn soglim mat Romi lipin. Punn aiz ponchvis vorsam odhik somplim punn azun Romi-chem kestanv azun jivem assa tem polloun ojeap dista. Zorui tor bai Brenda-n hench pustok Romi lipi-n porgott kelelem zalear koslem unnem ponn aslem ghai? Nagri-n boroilem pustok Romi vachpeanchea athan zobor-xem poddonam anim ugttea ponnim anv sangtam, anvui Nagri vachinam, karann bhurgeaponnim thaun anv Romichi boroin anim vachun ailam. Romi-n boroilelim pustokam aiz pordhesant vetele Goemkar mogan ghetat, vachtat anim pordhesan vhortat. Nam zalear polle adle amche Konkani Romi boroinar zoxe porim Romanxincho raza Reginald Fernandes, Joao Inacio de Souza, Bonaventuro Pietro anim adi. Adle Tarvotti bhav tarvar vechea adim Reginald Fernandes-achi romanx ghetlea bhogor tarvar vochonaslo. Aplo vell kitem torui mogan vachun sartolo mhunn anim tenvui zalear amche Konkani Romi lipin. Urbha mhaka bhogta polloun amchea tiatrist bhav-bhoineank, je dis-rat Romi lipichi seva kortat ti polloun. Osoch ho Konknnicho anim Romi lipicho bhavtto tumi unch dourunk mhuzo anvddo anim otreag zaun asat. Xabaski tumkam, tiatrist bhav-bhoineank, Romi lipi tume azun jivi dourunk vaur kortat dekhun. Khoim pavli amchi Konkani Romi lipi? Kiteak tika khas apleach putam-dhuvanim pois dovorlea? Anim kednam Romi lipik favo to mhannacho zago mellot ghai?

Konknnicho Romi Borovpi,
Mguel Barreto, Kepem-USA